اردو ادب کا سچا سپاہی: پروفیسر ڈاکٹر محمد شفیع چوبدار - ایک بے لوث خدمت گزار، مخلص قلم کار اور محقق اور اردو کا سچا خادماز قلم : عثمان احمد عمرکھیڑ ضلع ایوت محل
اردو ادب کا سچا سپاہی: پروفیسر ڈاکٹر محمد شفیع چوبدار -
ایک بے لوث خدمت گزار، مخلص قلم کار اور محقق اور اردو کا سچا خادم
از قلم : عثمان احمد عمرکھیڑ ضلع ایوت محل
اردو زبان و ادب کی تاریخ گواہ ہے کہ اس کی ترویج و ترقی میں جہاں ان گنت مخلص اور جاں نثار محققین، اساتذہ اور ادیبوں نے اپنا خونِ جگر صرف کیا ہے، وہیں ایسے عناصر کی بھی کمی نہیں رہی جنہوں نے اردو کے نام کو ذاتی مفادات، تشہیر اور پروپیگنڈے کا ذریعہ بنایا۔ لیکن ان نام نہاد اور فیشنیبل ادبی دکانیں چمکانے والوں کی بھیڑ میں کچھ ایسی نابغہ روزگار شخصیات بھی موجود ہیں جنہوں نے شہرت کی چکاچوند سے کوسوں دور رہ کر، خاموشی اور خلوص کے ساتھ اردو کے گلشن کی آبیاری کی۔ ایسی ہی قدآور اور باوقار شخصیت کا نام پروفیسر ڈاکٹر محمد شفیع چوبدار ہے، جنہوں نے اپنی زندگی کے تین دہائیوں سے زائد قیمتی سال اردو زبان، ادب اور صحافت کی نذر کر دیے ہیں۔
سولاپور کی ادبی اور تہذیبی روح
مہاراشٹر کے خطے خصوصاً سولاپور کی سرزمین پر اردو کی تہذیبی، علمی اور ادبی روایات کو زندہ رکھنے اور اسے نئی نسل تک منتقل کرنے میں ڈاکٹر محمد شفیع چوبدار کا کردار ستون کی حیثیت رکھتا ہے۔ ان کی گوناگوں ادبی سرگرمیاں کسی ایک پلیٹ فارم تک محدود نہیں ہیں، بلکہ:
بزمِ غالب کی محفلیں ہوں،
خادمانِ اردو فورم کی سرگرمیاں ہوں،
نور ٹرسٹ کے فلاحی و تعلیمی اقدامات ہوں،
یا سولاپور اردو گھر کا متحرک پلیٹ فارم ہو،
ہر جگہ ان کی فعال موجودگی اس بات کی گواہی دیتی ہے کہ ان کا رشتہ اردو کے ساتھ محض رسمی نہیں، بلکہ روح اور اخلاص کا رشتہ ہے۔
صحافتی خدمات: ‘صدائے مہاراشٹر’ کا عزم
ڈاکٹر شفیع چوبدار کی شخصیت کا ایک اور روشن پہلو ان کی گراں قدر صحافتی خدمات ہیں۔ وہ برقی خبرنامے ’صدائے مہاراشٹر‘ کے ذریعے نہ صرف سولاپور بلکہ پورے ہندوستان کے گوشے گوشے میں بکھری ہوئی اردو کی ادبی، تعلیمی اور تہذیبی سرگرمیوں کو منظرِ عام پر لانے کا فریضہ بخوبی انجام دے رہے ہیں۔ یہ ان کی کشادہ قلبی کا منہ بولتا ثبوت ہے کہ وہ خود تو اردو کی خدمت کر ہی رہے ہیں، بلکہ دوسروں کی ادبی کاوشوں کو بھی دنیا کے سامنے لا کر اردو کی اجتماعی خدمت کا فریضہ انجام دے رہے ہیں۔
‘قومی ماجد دریاآبادی ایوارڈ’ کا حصول ہم تمام کے لیے میل کا پتھر ثابت ہو انشاء اللہ ۔
یہ امر انتہائی خوشی اور فخر کا باعث ہے کہ ڈاکٹر صاحب کی طویل المدتی، مخلصانہ اور بے لوث خدمات کا اعتراف اب صرف مقامی سطح تک محدود نہیں رہا، بلکہ قومی سطح پر ان کی علمی و لسانی صلاحیتوں کو سراہا گیا ہے۔ انہیں ‘قومی ماجد دریاآبادی ایوارڈ’ سے سرفراز کیا جانا دراصل ان کی تین دہائیوں پر محیط انتھک ادبی جدوجہد اور والہانہ وابستگی کی بین دلیل ہے۔ یہ ایوارڈ محض ایک فرد کا اعزاز نہیں، بلکہ خطہ سولاپور کی گنگا جمنی تہذیب اور ان تمام اردو دوستوں کے لیے فخر کا نشان ہے جو اردو کی بقا اور ترویج کے لیے شب و روز سرگرمِ عمل ہیں۔
اردو کو مقصدِ حیات بنانے والا
آج کے مادہ پرست دور میں جہاں قلم کو تجارت کا ذریعہ سمجھا جاتا ہے، ڈاکٹر شفیع چوبدار نے قلم کو عبادت سمجھا ہے۔ انہوں نے اردو کو کبھی ذاتی تشہیر یا مفاد کی سیڑھی نہیں بنایا، بلکہ اردو کو اپنا مقصدِ حیات قرار دیا۔ ان کی پہچان ان کے بلند بانگ دعوے نہیں، بلکہ ان کا ٹھوس اور مسلسل عملی کام ہے۔
چوبدار صاحب کی اس بے لوث اور روشن جدوجہد پر شاعر کا یہ شعر بالکل صادق آتا ہے:
چراغ بن کے جو خود کو جلا رہے ہیں لوگ
وہی تو شہر میں اردو بچا رہے ہیں لوگ
اور علامہ اقبال کا یہ فرمان ان کی عملی زندگی کی عکاسی کرتا ہے:
عمل سے زندگی بنتی ہے جنت بھی جہنم بھی
یہ خاکی اپنی فطرت میں نہ نوری ہے نہ ناری ہے۔
پروفیسر ڈاکٹر محمد شفیع چوبدار صاحب! آپ کی علمی خدمات کو سلام، آپ کے بے داغ اخلاص کو خراجِ تحسین اور اردو سے آپ کی اس بے پناہ محبت پر پوری اردو دنیا کو فخر ہے۔
اللہ تعالیٰ سے دعا ہے کہ وہ آپ اور ہم تمام سے راضی ہو اور آپ کے قلم کو مزید قوت، آپ کی فکر کو مزید وسعت اور آپ کی اردو نوازی کو تادیر سلامت اور سرفراز رکھے۔ آمین!
Comments
Post a Comment