یومِ اطفال: (بچوں کے حقوق، خواب اور ہمارا فرض) - نور افشاں جونپوری


یومِ اطفال: (بچوں کے حقوق، خواب اور ہمارا فرض) - 
 نور افشاں جونپوری

دنیا کے ہر ملک میں بچوں کو ایک خاص مقام حاصل ہے، کیونکہ بچے کسی بھی قوم کا مستقبل اور روشن کل کی امید ہوتے ہیں۔ انہی کی معصوم ہنسی سے گھروں میں بہار آتی ہے، انہی کے خوابوں سے قومیں آگے بڑھتی ہیں۔ اسی اہمیت کے پیشِ نظر ہر سال یومِ اطفال بڑے جوش و خروش سے منایا جاتا ہے۔ یومِ اطفال کا مقصد صرف خوشیاں منانا نہیں، بلکہ یہ دن ہمیں یہ احساس بھی دلاتا ہے کہ بچوں کے حقوق، تعلیم، صحت اور حفاظت کی ذمہ داری ہم سب پر عائد ہوتی ہے۔ بچے کسی بھی قوم کا قیمتی سرمایہ ہوتے ہیں، ان کی تربیت اور کردار سازی ہی کسی ملک کو مضبوط بنیاد فراہم کرتی ہے۔ اسلام میں بھی بچوں کے حقوق کو بہت اہمیت دی گئی ہے۔ حضورِ اکرم ﷺ بچوں سے بے پناہ محبت کرتے تھے آپ ﷺ فرمایا کرتے تھے: جو ہمارے چھوٹوں پر رحم نہ کرے، وہ ہم میں سے نہیں۔یہ فرمان ہمیں یہ سکھاتا ہے کہ بچوں کے ساتھ نرمی، شفقت اور احترام کا برتاؤ کرنا ایمان کا حصہ ہے۔ یومِ اطفال کے موقع پر اسکولوں میں تقریبات، کھیلوں کے مقابلے اور ثقافتی پروگرام منعقد کیے جاتے ہیں تاکہ بچوں کو اپنی صلاحیتوں کے اظہار کا موقع ملے۔ اس دن بچوں کو یہ احساس دلایا جاتا ہے کہ وہ قیمتی ہیں، اُن کی آواز سنی جاتی ہے، اور اُن کے خوابوں کی تکمیل ہی ہمارا مقصد ہے۔ آج کے دور میں ہمیں یہ سوچنا ہوگا کہ ہم اپنے بچوں کے لیے کیسا مستقبل بنا رہے ہیں؟ کیا ہم انہیں تعلیم، محبت اور محفوظ ماحول فراہم کر رہے ہیں؟ اگر ہم آج بچوں کی پرورش محبت، ایمان اور علم کی روشنی میں کریں گے تو کل یہ بچے ہماری قوم کے سب سے قیمتی رہنما بن کر اُبھریں گے۔ بچے پھولوں کی طرح ہوتے ہیں انہیں محبت اور توجہ دو تاکہ وہ خوشبو بن کر پوری دنیا میں اپنا نام روشن کریں۔ یومِ اطفال ہمیں یہ پیغام دیتا ہے کہ ہم اپنے بچوں کو صرف خوش نہیں رکھیں بلکہ اُن کے خوابوں کو پروان چڑھانے کے لیے خود بھی بہتر انسان بنیں۔ کیونکہ آج کے بچے ہی کل کا مستقبل ہیں۔ بچوں کی اہمیت اور ان کے حقوق پر بات کرتے ہوئے ہمیں اُن حقیقی مثالوں کو بھی یاد رکھنا چاہیے جو یہ ثابت کرتی ہیں کہ چھوٹے دلوں میں بھی بڑے خواب بستے ہیں۔ دنیا میں ایسے کئی بچے ہیں جنہوں نے اپنی معصوم عمر میں دوسروں کے لیے کچھ کر دکھایا۔ انہی میں سے ایک کہانی ہے ننھے استاد احمد کی، جو نہ صرف یومِ اطفال کی روح کو ظاہر کرتی ہے بلکہ ہمیں یہ سبق بھی دیتی ہے کہ اگر حوصلہ سچا ہو تو عمر چھوٹی ہونے کے باوجود انسان بڑا کارنامہ انجام دے سکتا ہے۔ یہ کہانی ہندوستان کے ایک چھوٹے سے گاؤں کی ہے، جہاں ایک لڑکا رہتا تھا احمد۔ احمد صرف 11 سال کا تھا مگر اس کے دل میں بہت بڑا خواب چھپا ہوا تھا۔ وہ چاہتا تھا کہ ایک دن اپنے گاؤں کے تمام بچوں کو پڑھا لکھا بنا دے تاکہ کوئی بھی بچہ جہالت کے اندھیرے میں نہ رہے۔ احمد خود گاؤں کے ایک چھوٹے سرکاری اسکول میں پڑھتا تھا۔ اس کا اسکول مٹی کا بنا ہوا تھا، کھڑکیاں ٹوٹی ہوئی اور اکثر استاد صاحب کئی کئی دن نہیں آتے تھے۔ احمد کو پڑھائی کا بہت شوق تھا اس لیے وہ خود کتابیں پڑھتا اور دوسروں کو سمجھانے کی کوشش کرتا۔ ایک دن اس نے دیکھا کہ اس کے پڑوس کے چند بچے اسکول نہیں جا رہے۔ اُس نے اُن سے پوچھا تو پتہ چلا کہ ان کے والدین غریب ہیں، وہ کتابیں اور بستہ نہیں خرید سکتے۔ احمد کے دل کو یہ بات بہت لگی۔ اس نے فیصلہ کیا کہ وہ ان بچوں کو خود پڑھائے گا۔ اگلے ہی دن وہ اپنے گھر کے صحن میں چھوٹا سا اسکول بنا کر بیٹھ گیا ایک پرانا تختہ، چند چاک کے ٹکڑے، اور زمین پر بچھا ایک پرانا چادر پہلے دن صرف تین بچے آئے۔ احمد نے بڑے پیار سے انہیں ’’الف، بے، تے‘‘ سکھایا۔ پھر اگلے دن پانچ بچے آئے۔ اور کچھ ہی ہفتوں میں اس کا صحن پورے گاؤں کے بچوں سے بھر گیا۔ احمد صبح اسکول جاتا، دوپہر میں کھیتوں میں اپنے والد کا ہاتھ بٹاتا، اور شام کو اپنے ننھے اسکول میں بچوں کو پڑھاتا۔ گاؤں کے لوگوں نے جب یہ دیکھا تو سب حیران رہ گئے۔ آہستہ آہستہ سب نے احمد کی مدد شروع کر دی کسی نے بلیک بورڈ دیا، کسی نے پرانی کتابیں، کسی نے بستے۔ ایک دن ضلع کے افسر گاؤں میں آئے اور جب انہیں احمد کی کہانی پتہ چلی تو وہ خود اُس کے صحن میں پہنچ گئے۔ احمد کے چھوٹے ہاتھوں میں چاک دیکھ کر وہ مسکرا دیے۔ انہوں نے احمد سے پوچھا: ’’بیٹا، تم یہ سب کیوں کرتے ہو؟‘‘ احمد نے معصوم لہجے میں کہا: سر، اگر میں اکیلا پڑھوں گا تو صرف میں بد لوں گا، لیکن اگر میں سب کو پڑھاؤں گا تو ہمارا پورا گاؤں بدل جائے گا۔ یہ سن کر افسر کی آنکھوں میں آنسو آ گئے۔ انہوں نے احمد کے گاؤں میں ایک نیا اسکول بنوایا ’’احمد ماڈل اسکول‘‘ اور احمد کو ’’یومِ اطفال‘‘ کے موقع پر خصوصی ایوارڈ دیا گیا۔ یہ کہانی ہمیں یہ سکھاتی ہے کہ بچے صرف معصوم نہیں ہوتے، وہ خوابوں کے سفیر ہوتے ہیں۔ اگر ہم ان کے خوابوں کو پہچان لیں، تو وہ دنیا کو بدلنے کی طاقت رکھتے ہیں۔ یومِ اطفال صرف خوشی کا دن نہیں، بلکہ بچوں کی صلاحیتوں کو مان دینے کا دن ہے۔

Comments

Popular posts from this blog

پانگل جونیئر کالج میں نیٹ, جی میں کامیاب طلباء کا استقبال۔

شمع اردو اسکول سولاپور میں کھیلوں کے ہفتہ کا افتتاح اور پی۔ایچ۔ڈی۔ ایوارڈ یافتہ خاتون محترمہ نکہت شیخ کی گلپوشہ

رتن نیدھی چیریٹیبل ٹرسٹ ممبئی کی جانب سے بیگم قمر النساء کاریگر گرلز ہائی اسکول اینڈ جونیئر کالج کو سو کتابوں کا تحفہ۔