شری وردھن میں آوارہ مویشیوں کا آتنگ: سڑکوں پر حادثات اور مارکیٹ میں بھگدڑ ، کسان شدید مالی بحران کا شکار، سخت انتظامی کارروائی کا مطالبہ

شریوردھن ضلع رایگڈھ سے اظہر ظہیرالدین کردمے کی رپورٹ: 

شری وردھن تعلقہ میں آوارہ مویشیوں کی بڑھتی ہوئی تعداد اب محض ایک معمولی انتظامی مسئلہ نہیں رہی بلکہ شدید جانی و مالی خطرہ بن چکی ہے۔ شہر کی مرکزی سڑکوں پر آوارہ مویشیوں کے گروہ کا درمیان میں جم کر کھڑے رہنا روزمرہ کا معمول بن چکا ہے، جس کی وجہ سے ساعاتِ رفت و آمد میں شدید ٹریفک جام ہو جاتا ہے۔ یہی نہیں بلکہ مصروف مارکیٹ کے علاقوں میں جانوروں کے اچانک بھڑکنے سے بھگدڑ مچ جاتی ہے، لوگ اپنی جانیں بچانے کے لیے ایک دوسرے سے سبقت لے جانے کی کوشش کرتے ہیں جس سے ایک دہشت کا ماحول پیدا ہو جاتا ہے اور عام شہریوں کی زندگی کھلم کھلا خطرے میں پڑ جاتی ہے۔ مزید برآں، پارکنگ میں کھڑی قیمتی گاڑیوں کو بھی یہ جانور ٹکریں مار کر شدید نقصان پہنچاتے ہیں۔   

سڑکوں پر حادثات اور شہر میں تباہی کے ساتھ ساتھ دیہی علاقوں اور کھیت کھلیانوں کی حالت بھی اس سے مختلف نہیں ہے۔ یہ آوارہ مویشی زرعی زمینوں اور باغات میں گھس کر تیار اور نودمیدہ فصلوں کو کھا جاتے ہیں اور اپنی نقل و حرکت سے پورے کے پورے باغات اور کھیتوں کو پیروں تلے روند کر اجاڑ دیتے ہیں۔ فصلوں اور باغات کی اس تباہی کے باعث غریب کسانوں کو بڑے پیمانے پر نا قابل تلافی مالی نقصان اٹھانا پڑتا ہے، جس کے نتیجے میں وہ قرض کے بوجھ تلے دب جاتے ہیں اور بعض اوقات خودکشی جیسے دل دہلا دینے والے واقعات جنم لیتے ہیں۔

اس سنگین صورتحال اور جانی و مالی نقصانات پر مقامی انتظامیہ اور پولیس کی جانب سے پیش رفت کی جا رہی ہے۔ بلاک ڈیولپمنٹ آفیسر (BDO) اور پولیس انسپکٹر سریندر گراڈ کے درمیان اس مسئلے پر اہم تبادلہ خیال ہوا ہے۔ جلد ہی تمام گرام سیوکوں کی ایک خصوصی میٹنگ منعقد کی جائے گی جس میں تمام دیہات کے پالتو جانوروں پر ٹیگ لگانے کی ہدایت دی جائے گی تاکہ مالکان کی شناخت ہو سکے۔ انتظامیہ نے واضح کیا ہے کہ اگر پالتو جانوروں کو کھلے عام سڑکوں یا دوسروں کے کھیتوں میں گھومتے ہوئے پایا گیا تو متعلقہ مالکان کے خلاف قانون کے مطابق سخت ترین انضباطی و قانونی کارروائی کی جائے گی۔   

اظہر ظہیرالدین کردمے

شریوردھن ضلع رایگڈھ