ضلع بیدر پولیس کی جانب سے یومِ شہدائے پولیس کا اہتمام، شہید کو خراجِ عقیدت پیش کیا گیا
بیدر، 21 اکتوبر (نامہ نگار)ضلع بیدر پولیس کی جانب سے آج پولیس پریڈ گراؤنڈ بیدر میں یومِ شہدائے پولیس 2026 کے موقع پر خصوصی پریڈ کا اہتمام کیا گیا۔ اس موقع پر سپرنٹنڈنٹ آف پولیس ضلع بیدر جناب پردیپ گُنٹی، آئی پی ایس، نے خصوصی پولیس پریڈ کی سلامی لی اور ملک کی سلامتی، امن و امان کے قیام اور عوام کے تحفظ کے لیے اپنی جانوں کا نذرانہ پیش کرنے والے شہید پولیس افسران کو خراجِ عقیدت پیش کیا گیا۔
تفصیلات کے مطابق ہر سال 21 اکتوبر کو یومِ شہدائے پولیس منایا جاتا ہے۔ اس دن 21 اکتوبر 1959 کو لداخ کے علاقے ہاٹ اسپرنگس میں پیش آنے والے اس واقعے کو یاد کیا جاتا ہے، جس میں سینٹرل ریزرو پولیس فورس (سی آر پی ایف) کے اہلکاروں نے وطن کی حفاظت کرتے ہوئے عظیم قربانی پیش کی تھی۔
اس وقت سی آر پی ایف کی ایک ٹیم، جس کی قیادت ڈپٹی سپرنٹنڈنٹ آف پولیس کرن سنگھ کررہے تھے، ہندوستان۔چین سرحد کے قریب دشوار گزار اور شدید سردی والے علاقے میں حفاظتی ڈیوٹی انجام دے رہی تھی۔ اسی دوران چینی فوجیوں نے جدید ہتھیاروں سے حملہ کردیا۔ اس حملے میں ڈی ایس پی کرن سنگھ سمیت سی آر پی ایف کے 9 اہلکاروں نے بہادری اور جرأت کے ساتھ مقابلہ کرتے ہوئے جامِ شہادت نوش کیا۔
ان بہادر اہلکاروں کی عظیم قربانی کی یاد میں منعقدہ یومِ شہدائے پولیس تقریب کے دوران ملک کی داخلی سلامتی، قانون و نظم کی برقراری اور دیگر سرکاری فرائض کی انجام دہی کے دوران اپنی جانیں قربان کرنے والے پولیس افسران اور اہلکاروں کے نام پڑھ کر سنائے گئے اور انہیں عقیدت و احترام کے ساتھ خراجِ عقیدت پیش کیا گیا۔
اس موقع پر تقریب کے مہمانِ خصوصی جناب گِتے مادھو وِٹھل راؤ، آئی اے ایس، چیف ایگزیکٹیو آفیسر، ضلع پنچایت بیدر، سمیت ضلع کی معزز شخصیات، پولیس افسران، عملے کے ارکان اور پرنٹ کے نمائندے موجود تھے۔ ضلع بیدر پولیس کی جانب سے تمام مہمانوں کا پرتپاک خیرمقدم کیا گیا۔
Comments
Post a Comment