بیِدر میں ”انقلاب کے علمبردار محمد ﷺ“موضوع پر ہمہ لسانی نعتیہ مشاعرہ

بیدر /31اگست (نامہ نگارمحمد عبدالصمد) انقلاب کے علمبردار پیغمبرِ اسلام حضرت محمد مصطفیٰ ﷺ سیرت مہم کے تحت جماعتِ اسلامی ہند بیدر اور ادارہ ادبِ اسلامی کے اشتراک سے اتوار کے روز کرناٹک ساہتیہ سنگھ کے آڈیٹوریم میں ہمہ لسانی نعتیہ مشاعرہ کا انعقاد عمل میں آیا۔پروگرام کا افتتاح جماعتِ اسلامی ہند بیدر کے رکن محمد نظام الدین صاحب نے کیا۔ اس موقع پر خطاب کرتے ہوئے انہوں نے قرآنِ مجید کی سورہ احزاب کی آیات 45 تا 47 کا حوالہ دیتے ہوئے کہا کہ نبی اکرم حضرت محمد ﷺ اللہ تعالیٰ کی طرف سے مقرر کردہ رسول اور پیغام پہنچانے والے تھے۔ آپ ﷺ حق کے گواہ، خوشخبری سنانے والے، خبردار کرنے والے، اللہ کے حکم سے اس کی طرف دعوت دینے والے اور روشن چراغ تھے۔پروگرام کی صدارت مقامی جماعتِ اسلامی ہند بیدر کے صدر محمد معظم صاحب نے کی۔ انہوں نے کہا کہ بیدر ضلع کثیر لسانی اور کثیر تہذیبی علاقہ ہے، جہاں کنڑ، ہندی، اردو، تیلگو اور مراٹھی بولنے والے افراد آباد ہیں۔ تمام زبانوں کے لوگوں تک نبی اکرم ﷺ کی حیاتِ مبارکہ اور آپ کے پیغام کو پہنچانے کے مقصد سے اس ہمہ لسانی نعتیہ مشاعرہ نشست کا اہتمام کیا گیا ہے۔ انہوں نے مزید کہا کہ نبی اکرم ﷺ کی لائی ہوئی انقلاب کی تحریک دراصل انسانی انقلاب تھی۔ آپ ﷺ نے انسانوں کو جوڑنے پوری انسانیت کو ایک قرار دینے، اخلاق و کردار کو پاکیزہ بنانے اور معاشرے میں مثبت تبدیلی پیدا کرنے کی جدوجہد کی۔ موجودہ دور کے معاشرے کے لیے بھی سیرتِ نبوی ﷺ ایک روشن رہنما کی حیثیت رکھتی ہے۔مختلف زبانوں میں شعری پیشکش

ہمہ لسانی نعتیہ مشاعرہ میں مختلف زبانوں کے شعراءنے نبی اکرم ﷺ کی سیرت و پیغام کے موضوع پر کلام پیش کیا۔کنڑ زبان میں ڈاکٹر شری رام چندر گنڈاپور، ڈاکٹر شری رگھو شنگھ بہترامہ، ڈاکٹر مکتمی ایم، شری اشواجیت ڈانڈین، ڈاکٹر شریا مہندر کر، شری سنگمیش جواڈی اور ودیاوتی نے اپنی نظمیں پیش کیں۔انگریزی زبان میں شری جگدیش برادر اور شریمتی دھن لکشمی پاٹل نے شعری کلام پیش کیا، جبکہ اردو زبان میں جناب سید جمیل احمد ہاشمی صاحب، منور علی شاہد، جناب سید قاسم ساجد، دیگلور جناب قاضی سید ادریس علی سحر، دیگلور، حامد سلیم حامد اور جناب حیدر علی شاکر سوداگر نے نعتیہ کلام پیش کیا۔ ہندی زبان میں جناب عظیم بادشاہ، بھالکی نے اپنی نظم پیش کی۔ادارہ ادبِ اسلامی بیِدر کے صدر جناب رفیع الزماں قادری صاحب نے تمہیدی گفتگو میں کہا کہ محمد ﷺ انقلاب کے علمبردار بن کر دنیا کو سچائی، انصاف، رحمت، عزت، اتحاد اور مساوات کا پیغام دینے والے نبی اکرم ﷺ کی تعلیمات سے عوام کو واقف کرانا اور آپ ﷺ کے بارے میں پائی جانے والی غلط فہمیوں کو دور کرنا سیرت مہم کا بنیادی مقصد ہے۔

اس موقع پر جناب مقصود علی صاحب نے اللہ تعالیٰ کی حمد اور نبی اکرم ﷺ کی مدح و ثنا پر مشتمل کلام پیش کیا۔ پروگرام میں ادبی ذوق رکھنے والے افراد، جماعتِ اسلامی ہند کے عہدیداران اور دیگر معززین نے شرکت کی۔آخر میں ادارہادبِ اسلامی بیِدر کے سکریٹری حامد سلیم حامد نے تمام شرکاءکا شکریہ ادا کیا۔