باشعور نوجوان ہی مضبوط جمہوریت کی بنیاد ہیں: ڈپٹی کمشنر آر۔ سنیہل - 18سال کی عمر مکمل کرنے والے نوجوان ووٹر لسٹ میں اپنا نام درج کرائیں - انجمن ڈگری کالج میں نوجوان ووٹروں کے اندراج کے سلسلے میں بیداری پروگرام

دھارواڑ،21ستمبر : (راست) انجمن اسلام میں ضلع انتظامیہ، ضلع پنچایت، ضلعی سویپ کمیٹی دھارواڑ SWEEP، انجمن آرٹس، سائنس، کامرس کالج و پی۔ جی۔ اسٹڈیز، انجمن انسٹی ٹیوٹ آف انفارمیشن ٹیکنالوجی اینڈ مینجمنٹ، الیکشن لٹریسی کلب ELCاور NSS یونٹ 1 و 2 کے مشترکہ زیرِ اہتمام منعقدہ "نوجوان ووٹروں کے اندراج کی مہم۔"جمہوریت محض ایک طرزِ حکومت کا نام نہیں بلکہ عوام کی اجتماعی شعوری قوت کا آئینہ دار نظام ہے جس میں ہر شہری کا ووٹ اس کے حقِ رائے دہی اور جمہوری ذمہ داری کی علامت سمجھا جاتا ہے۔ نوجوان کسی بھی معاشرے کا مستقبل اور جمہوری نظام کی مضبوط بنیاد ہوتے ہیں۔ اگر نوجوان اپنے حقِ رائے دہی کی اہمیت کو سمجھیں اور ذمہ داری کے ساتھ اس کا استعمال کریں تو معاشرے میں مثبت اور تعمیری تبدیلی کی راہیں ہموار ہوسکتی ہیں۔اسی مقصد کے تحت دھارواڑ میں نوجوان ووٹروں میں انتخابی شعور بیدار کرنے اور اہل نوجوانوں کو ووٹر فہرست میں اپنا نام درج کرانے کی ترغیب دینے کے لیے خصوصی بیداری پروگرام منعقد کیا گیا۔ اس موقع پر مہمان خصوصی ڈپٹی کمشنر محترمہ آر۔ سنیہل نے نوجوانوں پر زور دیا کہ وہ محدود سوچ کے بجائے بڑے خواب دیکھیں اور اپنے مستقبل کی تعمیر میں فعال کردار ادا کریں۔انہوں نے کہا کہ نوجوانوں کو چھوٹے خوابوں تک محدود نہیں رہنا چاہیے بلکہ بڑے مقاصد متعین کرکے آگے بڑھنا چاہیے۔ زندگی میں آگے بڑھنے اور ایک بہتر معاشرے کی تشکیل کے لیے اپنے حقِ رائے دہی کا استعمال ضروری ہے۔ نوجوان ووٹ دیں اور اپنے باشعور و اہل نمائندوں کا انتخاب کریں۔ڈپٹی کمشنر نے کہا کہ دھارواڑ کے مختلف تعلیمی مراکز میں تقریباً 10ہزار سے زائد طلبہ تعلیم حاصل کررہے ہیں۔ اتنی بڑی تعداد میں نوجوانوں کی موجودگی اس بات کا تقاضا کرتی ہے کہ 18 سال یا اس سے زائد عمر کے تمام اہل طلبہ اپنا نام ووٹر فہرست میں درج کرائیں اور انتخابی عمل کا حصہ بنیں۔انہوں نے طلبہ سے کہا کہ انتخابی اندراج کو محض ایک رسمی کارروائی نہ سمجھا جائے بلکہ اسے ایک ذمہ دار شہری کی حیثیت سے اپنی ذمہ داری تصور کیا جائے۔ نوجوان خود بھی ووٹر کے طور پر اپنا اندراج کرائیں اور اپنے گھر، خاندان، دوستوں اور آس پاس کے لوگوں کو بھی اس کی اہمیت سے آگاہ کریں۔انہوں نے کہا کہ ایک باشعور ووٹر نہ صرف اپنے حق کو پہچانتا ہے بلکہ دوسروں کو بھی ان کے جمہوری حقوق اور ذمہ داریوں سے آگاہ کرتا ہے۔ اسی شعور کو فروغ دینے کے مقصد سے انجمن اسلام کالج میں یہ خصوصی پروگرام منعقد کیا گیا ہے۔ضلع پنچایت کے چیف ایگزیکٹیو آفیسر بھونیش دیوداس پاٹل نے خطاب کرتے ہوئے کہا کہ شہری شعور صرف ووٹنگ تک محدود نہیں بلکہ اپنے معاشرے اور ماحول کو بہتر بنانے کی ذمہ داری بھی اسی شعور کا حصہ ہے۔ اپنے آس پاس کی دنیا کو بہتر بنانے کی جانب پہلا قدم صفائی ہے۔انہوں نے کہا کہ دھارواڑ ضلع کو صاف ستھرا اور مثالی بنانے کے لیے نوجوانوں کو آگے آنا چاہیے۔ انہوں نے طلبہ سے اپیل کی کہ وہ نہ صرف انتخابی بیداری مہم بلکہ صفائی اور سماجی ذمہ داری سے متعلق تمام مثبت سرگرمیوں میں بھرپور تعاون کریں۔ نائب صدر الحاج بشیر احمد جاگیردار نے اپنے خطاب میں کہا کہ نوجوان کسی بھی قوم کا قیمتی سرمایہ ہوتے ہیں۔ نوجوانوں میں انتخابی شعور پیدا کرنا دراصل ملک کے جمہوری مستقبل کو مضبوط بنانے کی کوشش ہے۔ انہوں نے اس بامقصد پروگرام کے انعقاد پر منتظمین کو مبارکباد پیش کی۔

پروگرام کے بعد ڈپٹی کمشنر محترمہ آر۔ سنیہل نے طلبہ کی سائیکل ریلی اور بائیک ریلی کو ہری جھنڈی دکھا کر روانہ کیا۔ ریلی کے ذریعے نوجوانوں میں ووٹر رجسٹریشن، حقِ رائے دہی اور شہری ذمہ داری کے پیغام کو عام کرنے کی کوشش کی گئی۔نوجوانوں کی شرکت سے یہ ریلی محض ایک سرگرمی نہیں بلکہ جمہوری شعور، شہری ذمہ داری اور مثبت سماجی فکر کے فروغ کا ایک مؤثر ذریعہ بن گئی۔اس موقع پرڈاکٹر سید قدیر ناظم سرگروہ سکریٹری انجمن اسلام ،ایجوکیشن بورڈکے اراکین جناب یاسین ہاویری پیٹ، جناب ریاض احمد ننےو صاحب نوَر، ڈاکٹر این۔ ایم۔ مکاندار، مختلف تعلیمی اداروں کے سربراہان پروفیسر متین بڑوی والے، ظہیر منگلگٹی، توفیق مرزا، این۔ ایچ۔ پاٹل اور عبدالرحمن ہری ہر، ضلع پنچایت کے پلاننگ ڈائریکٹر ڈی۔ ایس۔ راٹھوڑ، پروفیسر اسماء ناز بلاری صدر شعبہ انگریزی ،ڈاکٹر بی بی عائشہ چکولی اسٹاف سیکریٹری اور ادارے کے تدریسی و غیر تدریسی عملے کے ارکان موجود تھے۔پروگرام کا آغاز طلبہ کی جانب سے ریاستی ترانہ پیش کرنے سے ہوا۔ پرنسپل ڈاکٹر این۔ بی۔ نالتواڑنے مہمانوں اور شرکاء کا خیرمقدم کیا۔ جناب خیرالدین شیخ نے تعارفی کلمات پیش کیے۔ڈاکٹر ایس۔ کے۔ جادھو نے "صفائی ہی خدمت ہے" کے عنوان سے شرکاء کو عہد دلایا۔ IQAC کوآرڈینیٹر ڈاکٹر سیدتاج النساء نے پروگرام کی نظامت کے فرائض انجام دیے، ELC کوآرڈینیٹر ناگراج کنکنی نے اظہارِ تشکر پیش کیا۔یہ پروگرام اس احساس کو مضبوط کرنے میں اہم ثابت ہوا کہ جمہوریت صرف ووٹ ڈالنے کا عمل نہیں بلکہ شعور، ذمہ داری اور اجتماعی شرکت کا نام ہے۔ جب نوجوان اپنے حقوق کے ساتھ اپنی ذمہ داریوں کو بھی سمجھتے ہیں تو وہ نہ صرف اپنے مستقبل کا فیصلہ کرنے میں شریک ہوتے ہیں بلکہ ایک باشعور، ذمہ دار اور مضبوط معاشرے کی تعمیر میں بھی اپنا کردار ادا کرتے ہیں۔(رپورٹ:ڈاکٹر بی بی عائشہ چکولی ،انجمن ڈگری کالج دھارواڑ)