قرآن اور رمضان: ہدایت کا نور۔از قلم : نورجہاں بانو بنت عبد العزیز خان طالبہ ایچ جے تھیم اقراء کالج مہرون جلگاؤں

قرآن اور رمضان: ہدایت کا نور۔

از قلم :  نورجہاں بانو بنت عبد العزیز خان طالبہ ایچ جے تھیم اقراء کالج مہرون جلگاؤں 

 

رمضان المبارک اور قرآنِ کریم کا آپس میں گہرا تعلق ہے۔ یہ وہ بابرکت مہینہ ہے جس میں اللہ تعالیٰ نے اپنی سب سے بڑی نعمت، ہدایت کا نور، قرآنِ کریم کی صورت میں نازل فرمایا۔ ارشادِ باری تعالیٰ ہے: "رمضان وہ مہینہ ہے جس میں قرآن نازل کیا گیا، جو لوگوں کے لیے ہدایت ہے اور جس میں رہنمائی اور حق و باطل میں فرق کی واضح نشانیاں ہیں۔" (البقرہ: 185)۔

قرآن ایک ایسی روشنی ہے جو دلوں کو منور کرتی ہے اور رمضان وہ مبارک مہینہ ہے جس میں اس روشنی کو اپنی زندگی میں جذب کرنے کا بہترین موقع ملتا ہے۔ یہ مہینہ ہمیں قرآن سے مضبوط تعلق قائم کرنے، اسے سمجھنے، اس پر غور کرنے اور اپنی عملی زندگی میں نافذ کرنے کا درس دیتا ہے۔ نبی کریم ﷺ رمضان میں حضرت جبرئیل علیہ السلام کے ساتھ قرآن کا دَور کیا کرتے تھے اور اسی سنت کی پیروی میں امت نے رمضان کو قرآن کی تلاوت، تدبر اور فہم کا مہینہ بنا لیا۔

بدقسمتی سے آج بہت سے لوگ رمضان میں صرف تلاوت پر اکتفا کرتے ہیں لیکن قرآن کی تعلیمات کو اپنی زندگی کا حصہ نہیں بناتے۔ قرآن محض الفاظ کا مجموعہ نہیں بلکہ ایک مکمل ضابطۂ حیات ہے، جو ہمیں ہر لمحہ راہ دکھاتا ہے، ہمارے مسائل کا حل پیش کرتا ہے اور ہمیں صراطِ مستقیم کی طرف گامزن کرتا ہے۔

اگر ہم چاہتے ہیں کہ رمضان کی برکتوں سے حقیقی طور پر فیض یاب ہوں تو ہمیں قرآن سے نہ صرف محبت بلکہ اس کی تعلیمات پر عمل کا بھی عہد کرنا ہوگا۔ یہ کتاب ہمیں صرف رمضان میں نہیں بلکہ زندگی کے ہر لمحے میں رہنمائی فراہم کرتی ہے۔ پس، آئیے اس رمضان کو قرآن کے نور سے اپنے دلوں کو روشن کریں اور اس ہدایت کو اپنی عملی زندگی میں اپنانے کی کوشش کریں، کیونکہ یہی حقیقی کامیابی کا راستہ ہے۔