جشنِ آزادی کے موقع پر رئیس ہائی اسکول میں مضمون نویسی اور ڈرائنگ مقابلوں کا انعقاد۔

بھیونڈی، 13 اگست 2026 : (عبدالعزیز انصاری) جشنِ آزادی کے موقع پر رئیس ہائی اسکول اینڈ جونیئر کالج، بھیونڈی میں طلبہ کی تعلیمی، تخلیقی اور فکری صلاحیتوں کو اجاگر کرنے کے لیے مختلف سرگرمیوں کا انعقاد کیا گیا۔ ’’ہر گھر ترنگا‘‘ مہم کے تحت صبح 8 بجے اسکول کے احاطے میں پرچم کشائی کی پروقار تقریب منعقد ہوئی۔

وائس پرنسپل عامر صدیقی اور اسسٹنٹ ہیڈماسٹر مخلص مدعوص کے دستِ مبارک سے قومی پرچم لہرایا گیا۔ پرچم کشائی کے بعد طلبہ اور اساتذہ نے قومی ترانہ پیش کیا اور قومی پرچم کو سلامی دی۔ اس موقع پر اسکول کا ماحول حب الوطنی کے جذبات سے معمور رہا اور طلبہ و اساتذہ نے ملک سے اپنی محبت اور وفاداری کا اظہار کیا۔

پرچم کشائی کی تقریب کے بعد طلبہ کی تخلیقی صلاحیتوں کو فروغ دینے اور ان کے اندر قومی شعور بیدار کرنے کے مقصد سے ڈرائنگ اور مضمون نویسی کے مقابلوں کا انعقاد کیا گیا۔ سیکنڈری اسکول کے طلبہ کے لیے ڈرائنگ مقابلہ منعقد ہوا، جس میں 70 طلبہ نے جوش و خروش کے ساتھ شرکت کی۔ طلبہ نے اپنی فنی صلاحیتوں کا مظاہرہ کرتے ہوئے آزادی، قومی یکجہتی، حب الوطنی اور وطن سے محبت جیسے موضوعات کو خوبصورت اور مؤثر انداز میں کاغذ پر پیش کیا۔

اسی سلسلے میں جونیئر کالج کے طلبہ کے درمیان مضمون نویسی مقابلہ منعقد کیا گیا، جس میں 60 طلبہ نے حصہ لیا۔ مقابلے کا موضوع ’’آزادی کے بعد ہندوستان کی ترقی کا سفر‘‘ مقرر کیا گیا تھا۔ طلبہ نے اپنے مضامین میں آزادی کے بعد ہندوستان کی تعلیمی، سائنسی، صنعتی، زرعی اور ٹیکنالوجی کے شعبوں میں ہونے والی نمایاں پیش رفت کا احاطہ کیا۔ اس کے ساتھ ہی انہوں نے ملک کے روشن، ترقی یافتہ اور خوشحال مستقبل کے حوالے سے اپنے خیالات، توقعات اور امیدوں کا بھی اظہار کیا۔

اس موقع پر اسکول انتظامیہ نے کہا کہ اس طرح کی سرگرمیوں اور مقابلوں کا مقصد طلبہ میں حب الوطنی، تخلیقی صلاحیت، خود اعتمادی، اظہارِ خیال کی قوت اور قومی شعور کو فروغ دینا ہے۔ ایسے پروگرام طلبہ کو اپنی صلاحیتوں کے اظہار کے ساتھ ساتھ ملک کی تاریخ، ترقی اور مستقبل کے تئیں اپنی ذمہ داریوں کو سمجھنے کا موقع بھی فراہم کرتے ہیں۔