اردو مضامین کی کتاب "مہک" کی رسمِ اجرا اردو اکیڈمی کے چیئرمین محمد فاروق شبلی کے ہاتھوں بہترین اردو تصانیف کے لیے دس ہزار روپے کے انعامات کا دوبارہ آغاز۔
پریس ریلیز :
کڑپہ، 3 اگست 2026 : آندھرا پردیش اسٹیٹ اردو اکیڈمی کے چیئرمین جناب محمد فاروق شبلی نے کہا کہ اردو زبان، ادب اور ثقافت کے فروغ کے لیے اکیڈمی نے جامع منصوبہ بندی کی ہے۔ انہوں نے اعلان کیا کہ ریاست کے اردو شعراء اور ادیبوں کی معیاری تصانیف کو اکیڈمی کے خرچ پر شائع کیا جائے گا، جبکہ منتخب بہترین تصانیف کے مصنفین کو 10,000 روپے نقد انعام بھی دیا جائے گا۔ اس انعامی اسکیم کو دوبارہ شروع کیا جا رہا ہے۔
اتوار کی شام کڑپہ شہر کے ماساپیٹ میں واقع ایس کیو ٹیکنالوجی کے دوسرے فلور کے کانفرنس ہال میں انجمن ترقیٔ اردو، ضلع کڑپہ کے زیرِ اہتمام ممتاز کثیر لسانی ادیب ستار فیضی کی اردو مضامین پر مشتمل کتاب "مہک" کی رسمِ اجرا جناب محمد فاروق شبلی کے ہاتھوں انجام پائی۔
اس موقع پر خطاب کرتے ہوئے انہوں نے کہا کہ ستار فیضی گزشتہ چالیس برسوں سے اردو ادب کی بے لوث خدمت انجام دے رہے ہیں اور متعدد اہم کتابیں تصنیف کر چکے ہیں۔ ان کی ادبی خدمات کے اعتراف میں حکومتِ آندھرا پردیش نے انہیں لائف ٹائم اچیومنٹ ایوارڈ سے نوازا ہے، جبکہ مختلف ادبی و سماجی اداروں نے بھی انہیں اعزازات سے سرفراز کیا ہے۔
تقریب کی صدارت ریٹائرڈ پروفیسر قاسم علی خان نے کی۔ مہمانانِ خصوصی میں مولانا آزاد ایوارڈ یافتہ ڈاکٹر ستار ساحر اور تلگو دیشم پارٹی کے ریاستی اقلیتی رہنما امیر بابو شامل تھے، جبکہ مہمانانِ اعزاز کے طور پر ایس وی یونیورسٹی، تروپتی کے ڈاکٹر نثار احمد اور بزمِ ساقی کے بانی ڈاکٹر امام قاسم ساقی نے شرکت کی۔
اس تقریب میں اردو زبان کے شائقین، انجمن ترقیٔ اردو کے عہدیداران، شعراء، ادباء، محققین، اساتذہ اور ادب دوست افراد نے بڑی تعداد میں شرکت کی
Comments
Post a Comment