اقراء شاہین جونیئر کالج میں فریشرز ڈے 2026-27 کا انعقاد - جماعت گیارہویں کے طلبہ و طالبات کا پُرجوش استقبال۔
جلگاؤں: اقراء ایجوکیشن سوسائٹی کے زیرِ انتظام اقراء شاہین اردو ہائی اسکول و جونیئر کالج، جلگاؤں میں تعلیمی سال 2026-27 کی جماعت گیارہویں کے طلبہ و طالبات کے استقبال کے لیے پُرجوش اور یادگار فریشرز ڈے پروگرام کا انعقاد عمل میں آیا۔
فریشرز ڈے کے انعقاد کا مقصد نئے طلبہ و طالبات کو کالج کے ماحول سے روشناس کرانا، اساتذہ اور ساتھی طلبہ کے ساتھ بہتر روابط قائم کرنا اور ان کے نئے تعلیمی سفر کا آغاز اعتماد اور جوش و خروش کے ساتھ کرنا تھا۔ پروگرام کے دوران طلبہ میں خاصا جوش و خروش دیکھا گیا۔
پروگرام کی صدارت اقراء ایجوکیشن سوسائٹی کے صدر ڈاکٹر عبد الکریم سالار نے کی، جبکہ جناب آصف شاہ صاحب بحیثیتِ مہمانِ خصوصی شریک ہوئے۔ اس موقع پر ڈاکٹر ہارون سر، ڈاکٹر وقار سر، ریاض شاہ سر، ذاکر شیخ سر اور معاون فوجداری افسر جناب پردیپ پاٹل صاحب کی خصوصی موجودگی رہی۔
پروگرام کی نظامت سہیل امیر سر نے پُراثر اور دلنشیں انداز میں انجام دی۔
اس موقع پر ڈاکٹر ہارون سر نے طلبہ و طالبات سے خطاب کرتے ہوئے باقاعدگی سے حاضری، نظم و ضبط، مؤثر مطالعہ اور تعلیمی و ہم نصابی سرگرمیوں میں فعال شرکت کی اہمیت پر روشنی ڈالی۔ انہوں نے طلبہ کو جونیئر کالج کے اہم تعلیمی دور کا بھرپور فائدہ اٹھانے، خود اعتمادی اور ابلاغی صلاحیتوں کو فروغ دینے اور اپنے مستقبل کے تعلیمی و پیشہ ورانہ اہداف پر توجہ مرکوز کرنے کی ترغیب دی۔
جناب آصف شاہ صاحب نے طلبہ و طالبات کی رہنمائی کرتے ہوئے اچھی صحت، باقاعدہ ورزش، متوازن غذا اور صحت مند طرزِ زندگی کی اہمیت اجاگر کی۔ انہوں نے طلبہ کو اپنی صحت کے تئیں بیدار رہنے اور روزمرہ زندگی میں صحت مند عادات اپنانے کی تلقین کی۔
پروگرام کے صدر ڈاکٹر عبد الکریم سالار نے طلبہ و طالبات کو نئے تعلیمی سفر کے آغاز پر مبارکباد پیش کرتے ہوئے محنت، نظم و ضبط، کردار سازی، مسلسل سیکھنے اور مقصد کے تعین کی اہمیت پر زور دیا۔ انہوں نے طلبہ کو اساتذہ اور والدین کا احترام کرنے کے ساتھ ساتھ جدید ٹیکنالوجی اور مصنوعی ذہانت (AI) کا ذمہ دارانہ اور مثبت استعمال کرنے کی تلقین کی۔
انہوں نے طلبہ کو ترغیب دی کہ وہ کامیابی کو صرف اچھے نمبروں تک محدود نہ رکھیں بلکہ اپنے شخصی کردار، خود اعتمادی، تخلیقی صلاحیتوں اور عملی مہارتوں کو بھی فروغ دیں، تاکہ وہ مستقبل میں ایک ذمہ دار اور کامیاب شہری بن سکیں۔
پروگرام کے دوران معزز مہمانانِ خصوصی اور اساتذہ کے حوصلہ افزا خیالات، تعلیمی رہنمائی اور صحت سے متعلق مفید پیغامات نے طلبہ و طالبات میں نئی توانائی، خود اعتمادی اور مثبت سوچ پیدا کی۔
پروگرام کے کامیاب انعقاد میں مسعود شیخ سر، عظیم قاضی سر، مشتاقیم خان سر، سہیل شیخ سر اور دیگر اساتذہ و معلمات نے اہم کردار ادا کیا۔ تمام اساتذہ کے باہمی تعاون اور انتھک کوششوں سے فریشرز ڈے پروگرام نہایت منظم، کامیاب اور یادگار ثابت ہوا۔
پروگرام کا اختتام تعلیمی سال 2026-27 میں تمام طلبہ و طالبات کی کامیابی، ترقی اور روشن مستقبل کے لیے نیک خواہشات کے ساتھ ہوا۔
Comments
Post a Comment