امتیاز کوکاٹے شری وردھن تعلقہ کانگریس کے صدر مقرر ، تعلقہ میں خوشی کی لہر۔

شریوردھن (راست) ضلع رائے گڑھ کانگریس میں ایک اہم تنظیمی تبدیلی کے تحت سینئر رہنما امتیاز کوکاٹے کو شری وردھن تعلقہ کانگریس کمیٹی کا صدر مقرر کیا گیا ہے۔ مہاراشٹرا پردیش کانگریس کمیٹی (MPCC) نے یہ منظوری ضلع صدر راجیندر مدھوکر (راجابھاؤ) ٹھاکر کی سفارش پر دی، جس کا اطلاق 28 جون 2026 سے ہو چکا ہے۔ پارٹی کارکنوں نے اسے کوکاٹے کی دیرینہ اور مخلصانہ خدمات کا بہترین اعتراف قرار دیا ہے۔

تقرری کے فوراً بعد راجابھاؤ ٹھاکر نے امتیاز کوکاٹے کو فون پر مبارکباد دی اور امید ظاہر کی کہ وہ شری وردھن میں پارٹی کو مزید مضبوط کریں گے۔ اپنے ردعمل میں نو منتخب صدر نے اس ذمہ داری کو ایک بڑا اعزاز قرار دیتے ہوئے کہا کہ وہ پہلے بھی شریوردھن شہرصدر اور نائب صدر جیسے مختلف عہدوں پر رہ کر پارٹی کے لیے کام کرتے رہے ہیں۔

امتیاز کوکاٹے صاحب نے شری وردھن تعلقہ میں کانگریس پارٹی کو مزید تقویت دینے اور مستحکم کرنے کے لیے اپنے عزم کا اظہار کرتے ہوئے کہا کہ وہ جلد ہی ہر گاؤں اور وارڈ سطح پر جا کر عوامی رابطہ مہم شروع کریں گے تاکہ عام لوگوں کے مسائل کو براہِ راست حل کیا جا سکے۔ انہوں نے مزید کہا کہ وہ پارٹی کے پرانے اور ناراض کارکنوں کو دوبارہ فعال کرنے اور نوجوان نسل کو کانگریس کے نظریات سے جوڑنے کے لیے چند ضروری اور انقلابی اقدامات اٹھانے جا رہے ہیں، جس سے تعلقہ بھر میں پارٹی کا تنظیمی ڈھانچہ فولادی بن جائے گا۔

امتیاز کوکاٹے نے اپنی اس کامیابی کا سہرا راجابھاؤ ٹھاکر کے سر باندھا اور سابق مرحوم ایم ایل اے مدھوکر ٹھاکر کو بھی انتہائی احترام سے یاد کیا، جن کی سرپرستی اور دعائیں ہمیشہ ان کے ساتھ رہیں۔ انہوں نے یقین دلایا کہ وہ تمام کارکنوں کو ساتھ لے کر چلیں گے۔ وہ اتوار، 28 جون کو ایک خصوصی مہم کے دوران باضابطہ طور پر اپنا عہدہ سنبھال چکے ہیں۔

دریں اثنا، تعلقہ بھر کے کارکنوں اور حامیوں کی طرف سے مبارکباد کا تانتا بندھ گیا ہے۔ مقامی رہنماؤں کا ماننا ہے کہ کوکاٹے کی متحرک قیادت اور بیرسٹر اے آر انتولے جیسے عظیم رہنماؤں کے نظریاتی ورثے کی بدولت شری وردھن میں کانگریس پارٹی ایک نئی توانائی کے ساتھ ابھرے گی۔