غزل - ازقلم : مہرالنّساء مہروؔ۔بیجاپور کرناٹک۔

غزل  - 

ازقلم : مہرالنّساء مہروؔ۔بیجاپور کرناٹک۔

خدا کا نور برسنے لگا ہے صورت پر

زمانہ رشک کرے ہے تمہاری قسمت پر

جنہیں بھروسہ نہیں رہتا اپنی محنت پر

وہ لوگ روتے ہی رہتے ہیں اپنی قسمت پر

مقابلے میں ہزاروں کے تین سو تیرہ

ہے فخر ہم کو صحابہ کی اس شجاعت پر

سکون و چین زمانے سے مٹ ہی جائےگا

تمہاری طرح اتر آئیں گر شرارت پر

کسی کو آنکھ اُٹھا کر کبھی نہیں دیکھا

ہمیں ہے ناز بہت آپ کی شرافت پر

ہمیں تو ایک دن انصاف مل ہی جائےگا

ہمیں یقین ہے اس دیش کی عدالت پر

کٹایا سجدے میں سر ہاں مگر جھکایا نہیں

زمانہ رشک کرے آپؓ کی شہادت پر

منافقوں سے ذرا مہروؔ ہوشیار رہو

یہ لوگ پردے ہی ڈالیں گے بس حقیقت پر

مہرالنّساء مہروؔ۔بیجاپور کرناٹک۔