اکولہ میں وحدتِ اسلامی کے زیرِ اہتمام 'دعوتِ توحید اور حقوقِ انسانی' پر عظیم الشان خطابِ عام کا انعقاد۔
اکولہ (نامہ نگار): وحدتِ اسلامی ہند کی مرکزی مہم کے تحت بروز پیر، 25 مئی 2026 بعد نمازِ عشاء، مومن پورہ مسجد، اکولہ میں خطابِ عام کا انعقاد کیا گیا۔ پروگرام کا مرکزی عنوان "دعوتِ توحید اور حقوقِ انسانی" تھا، جس میں شہر سے کثیر تعداد میں سامعین نے شرکت کرکے پروگرام کو کامیابی سے ہمکنار کیا۔
پروگرام کا باقاعدہ آغاز حافظ و قاری حسّان خان صاحب کی مسحور کن تلاوتِ کلامِ پاک سے ہوا۔ اس کے بعد ڈاکٹر عبدالعلیم نے اپنے مخصوص انداز میں بہترین ترانہ پیش کر کے حاضرین کے دلوں کو گرما دیا۔
مہمانِ مقرر کا بصیرت افروز خطاب:
اورنگ آباد سے تشریف لائے وحدتِ اسلامی مشرقی مہاراشٹر کے نقیب اور مہمانِ مقرر محترم ابرار عارف صاحب نے اپنے خطاب میں عنوان کی مناسبت سے تفصیلی اور مدلل گفتگو کی۔ انہوں نے حضرت ابراہیم علیہ السلام کی سیرتِ طیبہ کا حوالہ دیتے ہوئے عقیدۂ توحید کی اہمیت اور اس کے آفاقی پیغام کو عصرِ حاضر کے تناظر میں واضح کیا۔ساتھ ہی رسول اللہ ﷺ کے تاریخی 'خطبہ حج الوداع' کی روشنی میں حقوقِ انسانی (Human Rights) پر سیر حاصل گفتگو کی۔ انہوں نے بتایا کہ اسلام نے چودہ سو سال پہلے ہی رنگ، نسل اور ذات پات کی تفریق کو مٹا کر انسانی حقوق کا وہ چارٹر پیش کر دیا تھا جس کی مثال دنیا کی تاریخ میں نہیں ملتی۔
نظامت و اختتام:
پروگرام کی بہترین اور جامع نظامت کے فرائض جناب عمان الرحمٰن خان نے بخوبی نبھائے۔ ملت کے نوجوانوں، بزرگوں اور ذمہ داران کی کثیر شرکت کے ساتھ یہ پروگرام کامیابی کے ساتھ اپنے اختتام کو پہنچا۔
Comments
Post a Comment