بیگم قمر النساء کاریگر گرلز جونیئر کالج سولاپور کا ایچ ایس سی امتحان میں شاندار مظاہرہ - مجموعی نتیجہ 94.73 فیصد؛ ہسٹری میں 100 نمبرات لے کر طالبات نے مہاراشٹر میں نام روشن کر دیا۔

شولاپور (نامہ نگار): مہاراشٹر اسٹیٹ بورڈ برائے سیکنڈری و ہائر سیکنڈری ایجوکیشن (ایچ ایس سی) کے سالانہ امتحانات 2026 کے نتائج کا اعلان کر دیا گیا، جس میں بیگم قمر النساء کاریگر گرلز جونیئر کالج، شولاپور کی طالبات نے غیر معمولی کامیابی حاصل کرتے ہوئے کالج کا پرچم بلند کر دیا۔ کالج کا مجموعی نتیجہ 94.73 فیصد رہا۔

امتحانی اعداد و شمار: تفصیلات کے مطابق، اس سال امتحان میں کالج کی کل 247 طالبات شریک ہوئی تھیں، جن میں سے 234 طالبات نے کامیابی کا تاج اپنے سر سجایا۔ نتائج کی تقسیم کچھ اس طرح رہی:

 ڈسٹنکشن (امتیازی کامیابی): 09 طالبات

 فرسٹ ڈویژن: 59 طالبات

 سیکنڈ ڈویژن: 138 طالبات

 پاس کلاس: 28 طالبات

آرٹس اور سائنس کی نمایاں طالبات: 

آرٹس کے شعبے میں سیدہ عائشہ امیر پٹیل نے 89.50 فیصد نمبرات کے ساتھ کالج میں پہلی پوزیشن حاصل کی۔ جویریہ عبدالرحیم قریشی 86.17 فیصد کے ساتھ دوسرے اور فاطمہ محمد صدیق شیخ 79.67 فیصد نمبرات لے کر تیسرے مقام پر رہیں۔

سائنس اسٹریم میں ذکرا شاہنواز کمپلی نے 75.17 فیصد نمبرات کے ساتھ پہلی پوزیشن حاصل کی۔ صالحہ عرفان نویندگی 74.17 فیصد کے ساتھ دوسرے جبکہ عمارہ عبدالسلام دفعدار 71.17 فیصد نمبرات کے ساتھ تیسرے مقام پر رہیں۔

ریاستی سطح پر منفرد اعزاز: کالج کے لیے سب سے زیادہ قابلِ فخر بات یہ رہی کہ پہلے اور دوسرے نمبر پر آنے والی طالبات نے ہسٹری (تاریخ) کے مضمون میں 100 میں سے 100 مارکس حاصل کر کے پورے مہاراشٹر میں اول مقام حاصل کیا ہے۔ اس تاریخی کامیابی نے کالج کے تعلیمی معیار پر مہر ثبت کر دی ہے۔

حوصلہ افزائی اور جشن: اس مثالی کامیابی پر کالج کی پرنسپل تحسینہ شیخ صاحبہ اور جونیئر کالج کے تمام اساتذہ و اسٹاف نے خوشی کا اظہار کیا۔ کامیاب طالبات کی گلپوشی کی گئی اور انہیں گلدستے پیش کیے گئے۔ اس موقع پر پرنسپل صاحبہ اور اساتذہ نے طالبات کو مبارکباد دیتے ہوئے ان کے روشن تعلیمی مستقبل کے لیے نیک خواہشات کا اظہار کیا۔