خانوادۂ بدر کا ایک اور درخشندہ ستارہ علمی افق پر نمودار: محمد فرقان اللہ خان کی ایچ ایس سی بورڈ امتحان میں شاندار کامیابی، 79.83 فیصد نمبرات حاصل کر کے خاندان اور علاقے کا نام روشن کر دیا۔

بلڈھانہ/کھامگاؤں (نامہ نگار: شعیب اللہ خان): علم و ادب اور سماجی خدمات کے لیے معروف 'خانوادۂ بدر' کے چشم و چراغ محمد فرقان اللہ خان ولد عرفان اللہ خان نے بارہویں (HSC) کے امتحانات میں 79.83 فیصد نمبرات کے ساتھ نمایاں کامیابی حاصل کر کے اپنی علمی صلاحیتوں کا لوہا منوا لیا ہے۔ یاد رہے کہ محمد فرقان اللہ خان کا تعلق اس معزز گھرانے سے ہے جس کی بنیادیں حضرت حافظ اللہ خان بدر صاحب کی علمی و ادبی میراث پر استوار ہیں۔ یہ خانوادہ اپنے علاقے میں نہ صرف تعلیمی سرگرمیوں کو فروغ دینے کے لیے ہمہ وقت فکر مند اور محنتی شمار کیا جاتا ہے، بلکہ سماجی، مذہبی اور سیاسی حلقوں میں بھی اپنی گہری گرفت اور منفرد پہچان رکھتا ہے۔

محمد فرقان اللہ خان، جو فی الوقت بلڈھانہ میں مقیم ہیں اور جن کا آبائی تعلق کھامگاؤں سے ہے، کی اس کامیابی پر علمی و عوامی حلقوں میں مسرت کی لہر دوڑ گئی ہے۔ ان کے اس شاندار نتیجے کو خانوادۂ بدر کی تعلیمی وراثت کا ایک اور روشن باب قرار دیا جا رہا ہے۔ علاقے کی ممتاز سیاسی و مذہبی شخصیات، دانشوروں اور محبانِ علم نے اس ہونہار طالب علم کو ان کی شاندار کارکردگی پر دلی مبارکباد پیش کرتے ہوئے اس امید کا اظہار کیا ہے کہ وہ مستقبل میں بھی اپنی خداداد صلاحیتوں سے ملک و ملت کا سر فخر سے بلند کریں گے۔ اس موقع پر فرقان اللہ خان کے لیے ہر طرف سے دعاؤں اور نیک خواہشات کا سلسلہ جاری ہے۔