نگر پریشد اردو پرائمری اسکول نمبر 6، مورشی میں یومِ مہاراشٹر اور تقسیمِ ترقّی نامہ کی پُروقار تقریب۔

نگر پریشد اردو پرائمری اسکول نمبر 6، مورشی میں یومِ مہاراشٹر اور تقسیمِ ترقّی نامہ کی پُروقار تقریب۔ 

مورشی :  (نامہ نگار این ۔ایس ۔بیگ امراؤتی )۔ مقامی نگر پریشد اردو پرائمری اسکول نمبر 6، مورشی، ضلع امراوتی میں یکم مئی 'یومِ مہاراشٹر' روایتی جوش و خروش اور وقار کے ساتھ منایا گیا۔ اس موقع پر جہاں ریاست کا یومِ تاسیس منایا گیا، وہی بچوں کی تعلیمی کامیابیوں کا جشن بھی بڑے پیمانے پر منعقد کیا گیا۔

پرچم کشائی اور اظہارِ خیال:

تقریب کا آغاز صدر مدرس کے دست مبارک پرچم کشائی سے کیا گیا۔ اس موقع پر اساتذہ نے یومِ مہاراشٹر کی اہمیت پر روشنی ڈالتے ہوئے ریاست کی تاریخ اور ثقافت کے حوالے سے اپنے خیالات کا اظہار کیا۔

نتائج کی تقسیم اور اعزازات:

تعلیمی سال کے اختتام پر طلبہ کے سالانہ نتائج (ترقی نامے) تقسیم کیے گئے۔ اپنی محنت کا ثمر پا کر بچوں کے چہرے خوشی سے کھل اٹھے۔

اولمپیاڈ امتحان: اس سال اولمپیاڈ کے امتحان میں نمایاں کامیابی حاصل کرنے والے طلبہ کو خصوصی اسناد (سرٹیفکیٹ) سے نوازا گیا۔سوم جماعت کی طالب علم سمبرینہ صدیق نے اس امتحان میں دو گولڈ میڈل حاصل کرکے اپنی اعلیٰ ذہانت کا لوہا منوایا ۔

والدین کی شرکت: طلبہ اپنے والدین کے ہمراہ اسکول پہنچے اور مسکراتے ہوئے اپنے ترقی نامے لے کر گھروں کو روانہ ہوئے۔

نئے طلبہ کا استقبال اور 'شالا پر وتیاری'

آئندہ تعلیمی سال کے لیے اول جماعت میں داخلہ لینے والے ننھے منے بچوں کا والہانہ استقبال کیا گیا۔ بچوں کو اسکول کے ماحول سے مانوس کرنے اور ان کی رغبت بڑھانے کے لیے

مختلف چھوٹے چھوٹے کھیلوں کا انعقاد کیا گیا۔

بچوں کی حوصلہ افزائی کے لیے تفریحی سرگرمیاں ترتیب دی گئیں۔والدین حضرات سے اسکول میں شہر کے دیگر بچوں کا داخلہ کروانے کی فکر کرنے کی ترغیب دی گئی۔

آئندہ تعلیمی سال کا لائحہ عمل

'شالا پور وتیاری' (اسکول کی پیشگی تیاری) مہم کے تحت صدر مدرس اور تمام اساتذہ نے مل کر ایک مشاورتی نشست کا انعقاد کیا۔ اس نشست میں اگلے تعلیمی سال کو مزید بہتر بنانے، تعلیمی معیار کو بلند کرنے اور طلبہ کی ہمہ جہت ترقی کے لیے ایک ٹھوس لائحہ عمل تیار کیا گیا۔

اس تقریب کی کامیابی پر اسکول انتظامیہ اور والدین نے خوشی کا اظہار کرتے ہوئے اساتذہ کی کاوشوں کو سراہا۔