رئیس جونیر کالج میں کیوریس مائنڈ سائنس ایکٹیویٹیز کیمپ میں طلبہ کے شاندار کیمیائی تجربات۔
رئیس جونیر کالج میں کیوریس مائنڈ سائنس ایکٹیویٹیز کیمپ میں طلبہ کے شاندار کیمیائی تجربات۔
بھیونڈی: (عبدالعزیز انصاری) طلبہ میں سائنسی شعور کو فروغ دینے اور عملی تجربات کے ذریعے سیکھنے کے رجحان کو مستحکم کرنے کے مقصد کے تحت رئیس ہائی اسکول اینڈ جونیئر کالج،بھیونڈی میں جاری ''کیوریس مائنڈ سائنس ایکٹیویٹیز کیمپ'' کے ساتویں دن کیمسٹری کے دو اہم تجربات — پیپر کرومیٹوگرافی (Paper Chromatography) اور ایکسوتھرمک ری ایکشن (Exothermic Reaction) — کامیابی کے ساتھ انجام دیے گئے۔کیمپ کے دوران طلبہ کو پیپر کرومیٹوگرافی کے ذریعے مختلف رنگوں اور مرکبات کی علیحدگی کا عملی مظاہرہ کروایا گیا۔ اس سرگرمی کے ذریعے طلبہ نے سیکھا کہ کس طرح مختلف اجزاء اپنی حل پذیری اور حرکت کی رفتار کے فرق کی بنیاد پر ایک دوسرے سے جدا ہوتے ہیں۔ اس تجربے نے طلبہ کے اندر تجسس کو مزید بڑھایا اور انہیں کیمیائی تجزیہ کے بنیادی اصولوں سے روشناس کرایا۔اسی طرح ایکسوتھرمک ری ایکشن کے تجربے کے ذریعے طلبہ کو ایسے کیمیائی تعاملات کے بارے میں آگاہ کیا گیا جن میں حرارت خارج ہوتی ہے۔ عملی مظاہرے کے دوران طلبہ نے خود مشاہدہ کیا کہ مختلف مادّوں کے ملاپ سے توانائی حرارت کی شکل میں خارج ہوتی ہے، جس سے ان کی سمجھ میں نمایاں اضافہ ہوا اور روزمرہ زندگی میں کیمیائی عمل کی اہمیت بھی واضح ہوئی۔شعبہ سائنس کے اساتذہ سمیہ انصاری اور مکرم خان کی مؤثر رہنمائی میں طلبہ نے نہایت دلچسپی، جوش و خروش اور لگن کے ساتھ ان سرگرمیوں میں حصہ لیا۔اس موقع پر پرنسپل ضیاء الرحمٰن انصاری کے ہمراہ معزز مہمانان ڈاکٹر نثار مقری، ڈاکٹر ابو طالب انصاری، محمد رفیع انصاری، شفیع مقری، ابو امامہ شیخ، مولانا اوصاف فلاحی، ملک مومن اور شمیم مومن صاحبان اساتذہ کرام نے کیمپ کا دورہ کیا اور طلبہ کی کارکردگی کا مشاہدہ کیا۔ تمام مہمانان نے طلبہ کی محنت اور صلاحیتوں کو سراہتے ہوئے ان کی بھرپور حوصلہ افزائی کی۔کیمپ کا بنیادی مقصد طلبہ کو عملی تجربات کے ذریعے سیکھنے کے مواقع فراہم کرنا ہے۔ منتظمین نے اس امید کا اظہار کیا کہ اس طرح کی سائنسی سرگرمیاں طلبہ میں تحقیق، مشاہدہ اور تجزیاتی صلاحیتوں کو مزید فروغ دیں گی اور انہیں مستقبل میں سائنسی میدان میں نمایاں مقام حاصل کرنے کے لیے تیار کریں گی۔
Comments
Post a Comment