پریس ریلیز۔۔ اسلامو فوبیا کے خلاف عالمی دن کے موقع پر، ایس آئی او نے مہاراشٹر میں نفرتی جرائم پر ایک دستاویز جاری کیا۔

ممبئی : (پریس ریلیز) اسٹوڈنٹس اسلامک آرگنائزیشن آف انڈیا، ساؤتھ مہاراشٹر نے ممبئی کے اسلام جمخانہ میں اسلاموفوبیا کے خلاف ایک دعوت افطار کا اہتمام کیا۔ افطار میں سماجی و سیاسی جماعتوں کے کارکنوں کے ساتھ وکلاء اور صحافیوں نے بھی شرکت کی۔ ایس آئی او کی طرف سے یہ قدم مہاراشٹر میں بڑھتے ہوئے مسلم مخالف ماحول کا مقابلہ کرنے کی پہل ہے۔

ایس آئی او ساؤتھ مہاراشٹر کے ریاستی صدر عزیر احمد نے شروع میں تمام حاضرین اور مقررین کا خیرمقدم کیا اور افطار کا مقصد بیان کیا۔ انہوں نے کہا کہ ملک میں بڑھتے ہوئے اسلاموفوبیا کی وجہ سے خاص طور پر مہاراشٹر میں مسلمانوں کے خلاف نفرت انگیز واقعات روزانہ رونما ہو رہے ہیں۔ کچھ سماج دشمن عناصر جان بوجھ کر اور منظم طریقے سے ایسی حرکتیں کرتے ہیں۔ مہاراشٹر میں پچھلے کچھ سالوں سے یہی صورتحال بنی ہوئی ہے۔ ریاست کے مختلف علاقوں میں جان بوجھ کر نفرت کا ماحول پیدا کرنے اور فسادات بھڑکانے کی متعدد کوششیں کی جارہی ہیں۔ روزانہ اس طرح کے سینکڑوں واقعات رپورٹ ہو رہے ہیں۔ درحقیقت بہت سی جگہوں پر ایسی سرگرمیوں کی قیادت سیاسی رہنما کر رہے ہیں۔ بہت سے سیاسی رہنما مسلمانوں کے خلاف نفرت انگیز بیانات دے رہے ہیں جس سے ایسی سرگرمیوں کی مزید حوصلہ افزائی ہو رہی ہے۔

اقوام متحدہ کی جانب سے 15 مارچ کو اسلاموفوبیا کے خلاف عالمی دن کے طور پر منایا جاتا ہے۔ یہ دن دنیا کے مختلف ممالک میں بڑھتے ہوئے اسلاموفوبیا سے نمٹنے کے لیے منایا جاتا ہے جو ایک سنگین مسئلہ بنتا جا رہا ہے۔ اس موقع پر ایس آئی او مہاراشٹر نے ایک افطار کا اہتمام کیا جہاں مختلف سماجی و سیاسی کارکنوں نے بڑھتے ہوئے اسلاموفوبیا اور مسلم مخالف واقعات سے نمٹنے کے لیے عملی اقدامات اور ساتھ مل کر اسلاموفوبیا کا مقابلہ کرنے پر تبادلہ خیال کیا۔

بامبے ہائی کورٹ کے ریٹائرڈ جج جسٹس کولسے پاٹل نے اس موقع پر خطاب کرتے ہوئے کہا کہ پہلے ہمیں ان لوگوں کی ذہنیت کو سمجھنا چاہیے جو یہ نفرت پھیلا رہے ہیں۔ پھر، مسلمانوں کو آئینی طور پر ایک ملک گیر تحریک چلانے کی ضرورت ہے، جس میں دلت، آدیباسی اور بہوجن سمیت تمام مظلوم اور پسماندہ طبقات کو اکٹھا کیا جائے۔

اس موقع پر معروف قانون دان اور ایسوسی ایشن فار پروٹیکشن آف سول رائٹس (APCR) کے نیشنل ایگزیکٹو ممبر ایڈووکیٹ فواز شاہین نے ملک بھر میں نفرت انگیز جرائم، بنیادی ذہنیت اور مسلم کمیونٹی کیوں اس کا شکار ہو رہی ہے اس کے بارے میں بتایا۔ انہوں نے یہ بھی وضاحت کی کہ جہاں پہلے فرقہ وارانہ فسادات کے دوران مسلم مخالف سرگرمیاں اور فرقہ وارانہ جذبات پھیلائے جاتے تھے، اب یہ واقعات روزمرہ کی زندگی میں عام ہوتے جا رہے ہیں، جس سے ہر عام آدمی میں نفرت پھیل رہی ہے۔ انہوں نے ایسے واقعات پر قابو پانے کے لیے سخت قانونی کارروائی کی ضرورت پر مزید زور دیا۔

سینئر صحافی اور دستاویزی فلم ساز کنال پروہت نے بتایا کہ کس طرح ثقافتی تفریح کے ذریعے یہ نفرت معمول کے مطابق ہمارے اندر ڈالی جا رہی ہے۔ ہم دیکھتے ہیں کہ گانوں، فلموں اور سوشل میڈیا کے ذریعے نفرت کو کس طرح معمول بنایا جا رہا ہے۔

اس کے بعد شرکاء نے اس بات پر اتفاق کیا کہ اسلاموفوبیا ایک قومی مسئلہ نہیں بلکہ ایک بین الاقوامی مسئلہ ہے، جو ایک اہم چیلنج ہے۔ اس حوالے سے مختلف تجاویز سامنے آئیں کہ مستقبل میں اسلاموفوبیا اور نفرت کی اس فضا کو ختم کرنے کے لیے اجتماعی طور پر کیسے اقدامات کر سکتے ہیں۔ ایس آئی او ساؤتھ مہاراشٹر کی جانب سے ایک جامع دستاویز بھی جاری کیا گیا، جس میں خاص طور پر مہاراشٹر میں نفرتی بیانات اور نفرت انگیز جرائم کے واقعات کو رپورٹ کیا گیا ہے۔ ایس آئی او نے ان معاملات میں ریاستی حکومت سے مخصوص کارروائی اور خاص قانون لانے کا مطالبہ بھی کیا ہے۔

سینئر صحافی اور سیاسی تجزیہ کار ڈاکٹر سلیم خان نے اس موضوع پر اپنے خیالات کا اظہار کرتے ہوئے کہا کہ سیاسی سرپرستی کے بغیر ایسی سرگرمیاں نہیں ہو سکتیں۔ مہاراشٹر میں مختلف سیاسی رہنما مسلم مخالف بیانات دیتے ہیں، جو اس طرح کی سرگرمیوں کو مزید تقویت دیتے ہیں اور نفرت کا ماحول پیدا کرنے میں اہم کردار ادا کرتے ہیں۔ تاہم، ہمیں ایسے افراد سے اجتماعی طور پر سوال کرنے کی کوشش کرنی چاہیے کہ انہیں ایسا کرنے کا اختیار کس نے دیا ہے۔ ہم سب کو مل کر کوششیں کرنی چاہئے، قانونی چارہ جوئی اور آئین کی حدود میں رہتے ہوئے عوام کو آگاہ کرنا چاہیے۔

اس موقع پر ممبئی فار پیس، آل انڈیا اسٹوڈنٹس فیڈریشن، ایسوسیشن فار پروٹیکشن آف سول رائیٹس، سماج وادی پارٹی اقلیتی سیل، جماعت اسلامی ہند، آل انڈیا مجلس اتحاد المسلمین سمیت دیگر سماجی تنظیموں سے وابستہ افراد، وکلاء حضرات، کئی صحافی اور ممبئی یونیورسٹی سے منسلک طلباء و نوجوان شامل تھے۔

جاری کردہ

محمد اویس صدیقی 

ریاستی سیکریٹری، رابطہ عامہ 

ایس آئی او ساؤتھ مہاراشٹر 

 9653231654