جمعیت اہلِ حدیث بیدر: نمازِ عیدالفطر صبح 7:15 بجے اشٹور رنگ روڈ کراس کے قریب ادا کی جائے گی۔

بیدر ۔ 16/ مارچ ۔ (نامہ نگار محمد عبدالصمد) جمعیت اہلِ حدیث بیدر کے صدر شیخ سلیم نے اپنے ایک پریس نوٹ میں اطلاع دی ہے کہ عیدالفطر کی مبارک و مسنون نماز بتاریخ یکم شوال المکرم صبح ٹھیک 7:15 بجے اشٹور رنگ روڈ کراس کے بائیں جانب واقع فٹبال گراؤنڈ کے سامنے  ادا کی جائے گی۔ پریس نوٹ کے مطابق اس بابرکت اجتماع میں نمازِ عیدالفطر کی امامت اور خطبۂ عید کی سعادت فضیلۃ الشیخ علاء الدین سلفی حفظہ اللہ کو حاصل ہوگی، جو اپنے علمی و دعوتی بیانات کے ذریعے حاضرین کو عید کی حقیقی روح، تقویٰ، اخوتِ اسلامی اور شریعتِ مطہرہ کی تعلیمات سے روشناس کرائیں گے۔ شیخ سلیم نے اہلِ ایمان سے پُرخلوص اپیل کی ہے کہ وہ سنتِ نبوی ﷺ کی پیروی کرتے ہوئے وقت کی مکمل پابندی کے ساتھ اشٹور رنگ روڈ کراس کے بائیں جانب واقع فٹبال گراؤنڈ میں پہنچیں اور عیدالفطر کی نماز باجماعت ادا کرکے اس عظیم اسلامی شعار کی تعظیم و توقیر کا عملی مظاہرہ کریں۔ انہوں نے مزید بتایا کہ نمازیوں کی سہولت کے پیشِ نظر شہر کے مختلف علاقوں سے اشٹور رنگ روڈ کراس کے بائیں جانب واقع فٹبال گراؤنڈ تک آمد و رفت کے مناسب انتظامات کیے گئے ہیں، تاکہ عوام الناس بآسانی نماز گاہ تک پہنچ سکیں اور اس روح پرور اجتماع میں شریک ہو سکیں۔

پریس نوٹ میں یہ بھی واضح کیا گیا ہے کہ اگر خدانخواستہ بارش کی صورت حال پیش آئے تو نمازِ عیدالفطر مساجد میں ادا کی جائے گی۔

آخر میں ذمہ دارانِ جمعیت نے تمام مسلمانوں سے گزارش کی ہے کہ عید کے اس مبارک موقع پر اتحاد و اتفاق، نظم و ضبط اور اسلامی آداب کو ملحوظ رکھتے ہوئے اس عظیم عبادت میں شرکت کریں اور اللہ تعالیٰ سے امتِ مسلمہ کی سلامتی، اتحاد اور فلاح و بہبود کے لیے خصوصی دعائیں کریں۔