ممبئی، اردو زبان و ادب کے فروغ کے لیے ایک بامقصد قدم۔

بھیونڈی (راست) بھیونڈی سے تعلق رکھنے والے چند ہم خیال دوستوں کے ایک متحرک گروپ کی جانب سے قائم کیا گیا ادبی پلیٹ فارم ’’ *الفاظ کرافٹ* ‘‘ کم وقت میں نئی نسل کے لیے اپنے ادبی و تخلیقی جوہر پیش کرنے کا ایک مؤثر ذریعہ بن کر ابھرا ہے۔ اس گروپ کے زیرِ اہتمام اوپن مائیک اور بیت بازی جیسے پروگرام نوجوانوں میں خاصی مقبولیت حاصل کر رہے ہیں۔

ان ہی ادبی کوششوں کی ایک نمایاں مثال ممبئی یونیورسٹی کے تین روزہ عالمی جشنِ اردو میں دیکھنے کو ملی، جہاں مختلف ادبی و ثقافتی پروگراموں کے ساتھ ساتھ طلبہ کے لیے ایک شاندار بیت بازی مقابلے کا انعقاد عمل میں آیا۔ اس مقابلے کی مکمل منصوبہ بندی اور انتظام کو *الفاظ کرافٹ* کے ممبران نے انجام دیا۔

یہ مقابلہ دو زمروں پر مشتمل تھا: جونیئر گروپ اور سینئر گروپ۔

جونیئر گروپ میں نہم جماعت سے جونیئر کالج تک کے طلبہ نے شرکت کی، جبکہ سینئر گروپ ڈگری کالج کے طلبہ کے لیے مخصوص تھا۔

قابلِ ذکر بات یہ رہی کہ مقابلے کو مکمل طور پر ڈیجیٹل انداز میں اسکرین پر پیش کیا گیا، جسے حاضرین نے بے حد پسند کیا۔ شرکاء نے اپنے عمدہ انتخاب، برجستہ انداز اور معیاری اشعار کے ذریعے سامعین سے خوب داد و تحسین سمیٹی۔

مقابلے کے مختلف مراحل—روایتی حرف راؤنڈ، حسنِ انتخاب، مصرع، لفظ اور منظر راؤنڈ—نے شرکاء کی شعری بصیرت، حاضر جوابی اور زبان دانی کو نمایاں کیا۔ فائنل مراحل میں پہنچنے والی ٹیموں نے معیاری اشعار اور پُراعتماد انداز سے دادِ تحسین حاصل کی۔

نتائج کے مطابق جونیئر گروپ میں صمدیہ ہائی اسکول اینڈ جونیئر کالج نے اول مقام حاصل کیا، جبکہ رئیس ہائی اسکول اینڈ جونیئر کالج، انجمنِ اسلام ڈاکٹر ایم آئی جے اور مدنی ہائی اسکول نے بالترتیب دوم، سوم اور حوصلہ افزائی کے انعامات حاصل کیے۔

سینئر گروپ میں جی۔ ایم مومن ویمنس کالج، یشونت راؤ چوہان مہاراشٹر اوپن یونیورسٹی (رئیس ہائی اسکول اسٹڈی سینٹر)، یونیورسٹی آف ممبئی اور مہاراشٹر کالج آف آرٹس، سائنس اینڈ کامرس نے بالترتیب اول، دوم، سوم اور حوصلہ افزائی کے انعامات اپنے نام کیے۔

یہ مقابلہ نہ صرف اردو زبان و ادب کے فروغ کی ایک کامیاب کوشش ثابت ہوا بلکہ نئی نسل میں شعری ذوق، تخلیقی اعتماد اور ادبی روایت سے وابستگی کو مضبوط کرنے میں بھی اہم کردار ادا کرتا نظر آیا۔