اوراد، جمال پور کے اسکولی طلبہ کی صحت کے حوالے سے ویلفیئر پارٹی آف انڈیا، بیدر ضلع کے مطالبات۔

 بیدر۔6/فروری (نامہ نگار) ویلفیئر پارٹی آف انڈیا، بیدر ضلع کو اوراد تعلقہ کے جمال پور سرکاری پرائمری اسکول میں پیش آئے افسوسناک واقعہ پر شدید تشویش اور رنج و غم ہے، جہاں دوپہر کے کھانے (Midday Meal) کے بعدکئی معصوم طلبہ کو فوڈ پوائزننگ کے شبہ میں اسپتال میں داخل کرنا پڑا۔دوپہر کے گرم کھانے کی اسکیم کا مقصد غریب اور محروم طبقے کے بچوں کو غذائیت، صحت اور تحفظ فراہم کرنا ہے، لیکن اس طرح کے واقعات اس اسکیم میں صفائی، معیار اور نگرانی پر سنگین سوالات کھڑے کرتے ہیں۔ بچوں کو پیٹ درد، متلی، قے اور اسہال جیسی تکالیف کا سامنا کرنا پڑا، جو کہ انتہائی قابلِ مذمت اور تشویشناک ہے۔یہ بیان ویلفیئر پارٹی آف انڈیا، بیدر ضلع صدر جناب مبشرسندھے نے دیاہے۔ انھوں نے اپنے بیان میں آگے کہاکہ ہم اس بات کو سراہتے ہیں کہ اساتذہ نے بروقت کارروائی کرتے ہوئے تمام بچوں کو فوری طور پر اسپتال پہنچایا اور محکمہ صحت نے علاج فراہم کیا، مگر ایسے واقعات کا دوبارہ پیش آنا کسی صورت قابلِ قبول نہیں۔ویلفیئر پارٹی آف انڈیا درج ذیل مطالبات کرتی ہے(۱)اس واقعہ کی شفاف اور وقت مقررہ کے اندر مکمل جانچ کی جائے(۲)قصوروار افسران، ٹھیکیداروں یا متعلقہ اداروں کے خلاف سخت تادیبی کارروائی کی جائے۔(۳)بیدر ضلع کے تمام سرکاری اسکولوں میں دوپہر کے کھانے کے معیار، صفائی اور تیاری کے نظام کا فوری جائزہ لیا جائے(۴)اسکولوں میں باقاعدہ صحت اور صفائی کے معائنے کو یقینی بنایا جائے۔(۵)متاثرہ بچوں کی مکمل صحت یابی تک طبی نگرانی اور سہولتیں فراہم کی جائیں (۶)بچوں کی صحت اور جان کے ساتھ کسی بھی قسم کی لاپروائی برداشت نہیں کی جائے گی۔ ویلفیئر پارٹی آف انڈیا بچوں کے حقوق، انصاف اور جوابدہی کے لیے مضبوطی سے ا ن کے پیچھے کھڑی ہے۔ اگر انصاف میں تاخیر یا کوتاہی برتی گئی تو ویلفیرپارٹی جمہوری اور آئینی طریقوں سے اپنی جدوجہد جاری رکھے گی۔